Saga skólans

Ágrip af sögu skólanna

Stöðvarfjarðarskóli

Stöðvarfjörður var gerður að sérstöku sveitarfélagi árið 1905. Kennt var í svonefndum farskóla þar sem einn eða tveir kennarar sinntu kennslu ýmist í þorpinu eða á bæjunum yfir skólaárið. Haustið 1937 var tekið í notkun nýtt húsnæði sem að hluta til var byggt í þeim tilgangi að þar færi fram kennsla (Samkomuhúsið). Þá má segja að kennsla hafi verið komin í fast form og farkennsla heyrði sögunni til að mestu leyti. Það náðist líka festa á mannahald við kennsluna og settur skólastjóri var Runólfur Einarsson, sem sinnti því frá 1937-1964. Anna Þorsteinsdóttir var skólastjóri veturinn 1964-1965.

Kennsla fór fram í Samkomuhúsinu samfellt frá árinu 1937 – 1965 þar til eldri hluti núverandi skólahúsnæðis var tekinn í notkun. Það haust tók Sólmundur Jónsson við skólastjórn og var allt til ársins 1989 þegar Jónas Eggert Ólafsson núverandi skólastjóri tók við stöðunni.

“Nýi skólinn” þótti hinn veglegasti, var 250m2 að flatarmáli. Í honum voru 3 kennslustofur, kennarastofa, lítið bókaherbergi, baðklefi og búningsherbergi, allstór gangur, kyndiklefi og 4 snyrtiherbergi.

Þegar fór að bera á þrengslum í skólahúsnæðinu festi hreppurinn kaup á íbúðarhúsi (Bakkagerði, eldra húsið) þar sem kennsla 1. og 2. bekkjar fór fram á efri hæð en leikskólinn var starfræktur á neðri hæð.

Hafist var handa við nýbyggingu við skólahúsið árið 1983. Í fyrstu var neðri hæðin tekin í notkun en vígsla viðbyggingar fór fram á vorönn 1997.

Íþróttakennsla fór fram í Samkomuhúsinu allt frá 1937 til 2000 þar til íþróttahúsið var tekið í notkun. Einnig var kennt á gangi “nýja” skólans og á skólalóðinni.

Sundkennsla fór fram á Búðum frá 1945-1960 en eftir það voru börn send að Eiðum í sundkennslu á vorin. Sundlaug var tekin í notkun á Stöðvarfirði árið 1983.

Leikskóli var stofnaður árið 1981 og var fyrst til húsa í Bakkagerði (eldra). Árið 1988 flutti leikskólinn í nýtt húsnæði, sem fékk heitið Balaborg. Það húsnæði var byggt sem leikskóli og þótti vel heppnuð bygging, allavega var alltaf góður andi í því húsi. Leikskólastjóri frá byrjun til ársins 2012 var Ingibjörg Eyþórsdóttir. Árið 2012 sameinuðust Leikskólinn Balaborg og Grunnskólinn á Stöðvarfirði undir nafninu Stöðvarfjarðarskóli og flutti leikskólinn inn í grunnskólahúsnæðið.

Tónlistarkennsla var ekki í föstum skorðum fyrr en upp úr 1980. Tónlistarskóli Stöðvarfjarðar var stofnaður árið 1987 og starfræktur til ársins 2004, þá var hann sameinaður tónlistardeild Grunnskóla Fáskrúðsfjarðar eftir sameiningu Stöðvar- og Búðahrepps. Skólinn hét Tónlistarskóli Austurbyggðar og var starfræktur á Stöðvarfirði og Fáskrúðsfirði. Eftir sameiningu við Fjarðabyggð heitir skólinn Tónlistarskóli Fáskrúðsfjarðar og Stöðvarfjarðar. Skólastjóri frá 2004 er Valdimar Másson.

Núverandi húsnæði

Stærð nýbyggingarinnar er um það bil 850 m2 að flatarmáli á tveimur hæðum og eldri byggingin er 250 m2 að flatarmáli. Leik- og Tónlistarskólinn eru með aðsetur sitt í eldri hlutanum, ásamt vinnuherbergi kennara. Einnig fer það fram smíðakennsla. Í nýrri hlutanum eru 3 almennar kennslustofur, list- og verkgreinastofa, auk heimilisfræðistofu og lítils kennslueldhúss. Einnig er sérkennslurými, ljósritun, kaffistofa starfsfólks, setustofa nemenda, fjölrými með leiksviði og salernisaðstaða fyrir kennara og nemendur. Bókasafn er á neðri hæð sem er sameiginlegt almennings -og skólasafn. Þar er einnig náttúrufræðistofa skólans. Íþróttahús var tekið í notkun 2000 og er það steinsnar frá skólanum og sundlaug er í sérhúsnæði á skólalóðinni.

Allstór malbikaður boltavöllur er við skólann, nokkur leiktæki, afgirt svæði með nýjum leiktækjum (leikskólinn) og sparkvöllur aðeins fjær, rétt utan skólalóðar, á svokölluðum Bala.

Skólasafn

Skólasafn hefur verið starfrækt frá 1990 á neðri hæð skólans og var sameinað almenningssafninu þetta sama ár.

Frekari upplýsingar má finna í „Skólasögu Stöðvarfjarðar : 1905-1981“ eftir Björn Hafþór Guðmundsson (útg. 1982).

Grunnskólinn í Breiðdalshreppi

Frá því að fræðslulög voru sett árið 1907 var skólahald í Breiðdal með farkennslusniði fram yfir miðja 20. öld. Kennt var til skiptis á nokkrum bæjum og sáu yfirleitt tveir kennarar um uppfræðsluna.

Upp úr 1930 komu fram hugmyndir um fastan skóla í hreppnum og 1944 var samþykkt á almennum hreppsfundi að heimavistarskóli og íþróttahús skuli standa í landi Heydala. Var það í samræmi við framtíðasýn margra sem sáu fyrir sér uppbyggingu sveitaþorps að Heydölum en á þessum tíma var þorpsmyndun ekki hafin á Breiðdalsvík svo heitið geti.

Árið 1945 hófst bygging íþróttahúss sem einnig átti að gegna hlutverki félagsheimilis í hreppnum og lauk því verki tveimur árum seinna. Lengri tíma tók að reisa skólabygginguna og fléttast þar inn í ágreiningur um staðsetningu skólans. Minnihluti vildi að hann yrði í landi Þverhamars þar sem vísir var orðinn að myndun sjávarþorps vegna aukinnar útgerðar og verslunar á meðan aðrir sáu enn fyrir sér drauminn um sveitaþorp.

Þann 29. janúar 1958 var skólinn í Staðarborg tekinn í notkun og starfaði hann sem heimavistarskóli til 1973 þegar tekinn var upp heimanakstur fyrir alla nemendur en árið 1969 hætti heimavist fyrir börn úr þorpinu. Skólahúsnæðið reyndist fljótlega of lítið vegna fjölgunar nemenda og gripið var til þess ráðs að kenna yngri nemendum í verbúðinni á Breiðdalsvík í nokkur ár frá 1967. Síðustu árin sem kennt var í Staðarborg var skólinn tvísetinn.

Árið 1975 var haldinn almennur hreppsfundur og voru allir sammála um að byggja nýjan skóla á Breiðdalsvík. Hafist var handa 1978 og var skólinn fokheldur 1986. Bág fjárhagsstaða varð þess m.a. valdandi að framkvæmdir við skólabygginguna gengu hægt en 19. september 1992 var skólinn vígður og hefur hýst skólastarf í Breiðdal síðan.

Mynd

Breiðdals- og Stöðvarfjarðarskóli